Schriftgrösse: A A A

Encurir | Sitemap

Historia e svilup

Gia el 15avel tschentaner dispona Laax da gronda autonomia. 1428 secumpran ils vischins libers dil domini dil cont Rudolf VII. de Werdenberg-Sargans. 1434 sesuttamettan ils Libers da Laax al protectorat digl uestg da Cuera e vegnan recepi dad el sco «libers commembers dalla Casa da Diu.» Ils Libers sepatrunan da dretgs finanzialmein interessants, sco las duanas ed il dretg da fiera.
Casa patrizianas bein mantenidas dattan perdetga dalla beinstonza dils habitonts. Ina impurtonta fasa da baghegiar entscheiva entuorn ils 1850 e vegn accelerada tras il barschament igl onn 1874 che ha intschendrau sis casas e treis clavaus.
Sco quei ch’igl ei stau il cass en biaras autras vischnauncas alpinas han ils da Laax, fagend il pur, luvrond da manual e vid lenna, durmiu ditg e bein la sien dils gests. Naven da 1962 ei denton tut semidau: Cun l’avertura dil Crap Sogn Gion ei il svilup turistic buca pli staus da frenar.
 
La regiun da Laax ei geologicamein fetg veglia. Il territori dalla vischnaunca tonscha naven dalla Platta Pussenta, digl Uaul Grond e dall’imposanta cavorgia da Laax entochen si tier il sparta-auas dils cuolms grischuns e glarunes. Ils nums Lavanuz e Nagens sin territori da Laax vegnan considerai sco preromans. Menziunau vegn il territori da Laax per l’emprema ga el testament digl uestg Tello da Cuera igl onn 765.




 

15 000 a. Cr

  La bova dil Crap da Flem – la pli gronda boca prehistorica dall’Europa – dat alla regiun sia fuorma hodierna.
     
765

 
  Igl uestg Tello da Cuera regala alla claustra benedictina da Mustér siu possess spatitschaus denter Flem e Trun. Il testament menziunescha il territori e nums da funs sigl intschess da Laax.
     
1290

  Il vitg da Laax vegn numnaus per l'emprema gada en in rodel dalla catedrala da Cuera.
     
1428

  Ils da Laax secumpran libers dil domini dil cont Rudolf VII de Werdenberg-Sargans e quei per 300 ducats en aur.
     
1677

  Monsignur Udalrich de Mont, uestg da Cuera, consecrescha la nova baselgia, dedicada als sogns patruns Gagl ed Otmar.
     
1871
  Il poet e scribent romontsch Flurin Camathias nescha a Laax.
     
1880

  Il Seehof, igl emprem hotel, vegn eregius a Laax.
Emprem hotel a Laax. Eregius egl onn 1880.
     
1903

  A Cuera cumpara «Die Freien von Laax», la lavur da dissertaziun da Pieder Tuor, posteriur professer per dretg a Fribourg, Genevra e Berna.
     
1928
  Fiasta centenara dils «Libers da Laax» a Marcau.
     
1956 – 1967   La vischnaunca stat sut curatel.
     
1962   Avertura dil territori da Crap Sogn Gion per il turissem.
     
1968
  Avertura dalla pendiculara Murschetg-Crap Sogn Gion.
     
1976



  L'administraziun da vischnaunca mida localitads si el niev Center communal. Per l'emprema gada ei ina dunna vegnida elegida en suprastonza communala. 
Casa Montalta (Casa leunga) Eregida en duas etappas 1609 – 1616
     
1980   Avertura dil museum local e dalla casa da scola nova Grava.
     
1982   Avertura dil bogn cuvretg Grava.
     
1983
  Avertura ufficiala dalla plazza sportiva «Lag Sec».
     
1984   Avertura dalla «Sentupada» cun localitads per las uniuns dil vitg.
     
1993   Avertura dalla nova sauna el bogn Grava.
     
1995   Cumpra da terren per la construcziun da stabiliments publics a Cons.
     
1996
  Fusiun dallas pendicularas da Laax e Flem.
     
1997



 

Avertura dalla Casa De Mont e dalla biblioteca dalla vischnaunca.
Fusiun dallas organisaziuns turisticas Flem-Laax-Falera.
Casa Arpagaus, il pli vegl baghetg existent. Savess derivar dil temps medieval (9. tschentaner).

     
1998

  Construcziun d'ina tschaffada d'aua Fops/Manul cun ina explotaziun d'aua optimala per la vischnaunca da Laax.
     
1999   Engrondiment ed augmentaziun dil museum local.
     
2000   Illuminaziun entuorn il lag e da Nadal.
     
2001
  Nova punt Val Vau.
     
2002   Stanza da fitness el bogn cuvretg.
     
2004   Engrondaziun dalla plazza da giugs.
     
2005   Introducziun dalla meglieraziun.
     
2006  

Sessiun federala a Flem e Laax.

     
2007   Finiziun dalla surbaghegiada communala Sontga Clau.
     
2008   Fusiun dils pumpers da Laax e Falera.
     
2008   Relasch d'ina zona da planisaziun.
     
2009   Realisaziun ovra hidraulica pintga.
     
2009   Teater el liber: «In siemi dalla notg sogn Gion».
     
2011   Renovaziun Villa Alpina

 


Sper il pli impurtont sectur economic, il turissem astgein nus buca emblidar l'agricultura, ch'ins sa aunc oz numerar cun sis menaschis. Per promover la veta culturala da Laax coopereschan era biaras uniuns ed organisaziuns.

Uras
d'avertura canzlia

Gliendisgis - Vendergis
09.30 tochen 11.30
15.00 tochen 17.00

Telefon:
081 921 51 51

E-Mail:
admin@laax-gr.ch


Adressa:
Center Communal
caum postal 16
7031 Laax

Plan da la situaziun
Plan dal vitg